新戲榮登華語片總票房第五位 魚蛋母女謝票大爆名場面內幕

新戲《九龍城寨之圍城》氣熱如虹，票房直至星期日朝早已突破6千3百萬，榮登香港電影史上華語片總票房第五位。雖然一眾主角好似古天樂同城寨四少等身處法國康城參展，而香港呢邊就由喺戲中有超水準演出，飾演魚蛋妹賺人熱淚嘅 王尹菁 同戲中媽媽 李紫僖 到戲院繼續謝票。

佢地一入場就獲觀眾報以熱烈掌聲，現年10歲嘅王尹菁拍攝時只有7歲，大家都俾佢自然嘅演出感動到，尹菁妹妹就坦言話聽到大家讚自己特別開心，仲話有同學模仿佢戲中嘅對白呀。

至於飾演魚蛋媽嘅李紫僖，喺戲中係一名染有毒癮嘅性工作者，俾朱柏康飾演嘅渣男老公虐打至死，陳屍後巷。佢嘅演技亦受到觀眾關注，原來李紫僖大有來頭，畢業於大學嘅表演系，演過唔少舞台劇，亦參演過TVB嘅劇集《賭城群英會》同《老表畢業喇》。更曾做過編劇，可以話幕前幕後都精通嘅才女。

李紫僖呢日亦多謝觀眾嘅關注同好評，講起戲中被老公虐打，佢大爆朱柏康戲外其實係一名暖男，事前會對位同檢查場景有冇潛在危險，好似地下有冇螺絲咁，確保對手安全，令佢可以放心演戲。

另外佢地亦提到戲中名場面嘅幕後花絮，魚蛋妹同林峯飾演嘅陳洛軍，見到魚蛋媽陳屍一幕，原來魚蛋媽同魚蛋妹係分開拍攝，尹菁只係憑想像而喊出嚟，而李紫僖拍攝陳屍一幕時，呢位小童星就喺片場學摺衣紙，李紫僖大讚尹菁呢位小小對手非常有天份交足戲，加上林峯嘅演繹，令大家留意到佢。

#九龍城寨之圍城 #華語片總票房第五位 #魚蛋媽 #李紫僖 #魚蛋妹 #王尹菁 #名場面背後
#TVB #娛樂新聞 #TVB娛樂新聞台

#ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
https://www.facebook.com/TVBENews

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0