陳奕迅澳門站頭場多次被觀眾亂叫打斷發言｜ 無奈：你再熱情我都係咁上下｜HK E News 娛樂新聞報道

陳奕迅噚晚喺澳門展開9場《FEAR AND DREAMS世界巡迴演唱會》，觀眾反應熱烈，不過talk位期間發生小插曲，被觀眾命令式叫佢講普通語，令佢今日變成熱搜人物，大部份觀眾及網民都支持佢講廣東話，認為澳門開演唱會講粵語係平常不過嘅事，不必為冇禮貌嘅觀眾而唔開心。

噚晚演唱會Talk位時，Eason本來好開心問觀眾「你哋係來自澳門？有幾多人來自澳門」，全場即歡呼，佢向台下道謝 : 「好多謝大家。成晚咁靜，你哋都不停嗌咩，下次留番依家先嗌，係靜位就留畀大家.... 你嗌到把聲沙晒我都戥你痛。」

由於觀眾太熱情，舞台上Eason多次想講整個演唱會想帶出嘅意義都被觀眾亂叫打斷，於是佢放棄兼苦笑講：「我知你哋特別熱情，但係我個騷，每隻歌都係一個連貫性舞台劇咁，我唔會畀你哋影響到我，我要好集中去用歌講故仔。其他人都唔好畀呢啲聲音、畀人影響到，我知㗎！其實就係大家沉醉喺一個夢裡面，但突然聽到鬧鐘聲，又或者你阿媽叫你起身大叫咁....」然後佢又被觀眾狂叫打斷再次無奈講：「你再熱情我都係咁上下，其實我聽唔得到你哋叫緊咩，我所有熱情都留咗喺唱歌度，依家係演唱會，唔係傾偈會，我唔可以同你一個人講嘢，而唔理全場其他觀眾....我耳仔好敏感，我同你講緊嘢，其他聲又嚟，我聽唔到，我會好煩.....」

此時有一位觀眾以命令式口吻大叫「講國語」、「講普通話」，Eason先以泰文打招呼作回應：「我想講甚麼語文就講甚麼！我可以講國語可以很流利！你可以要求，你可以『唔該』，『請』，『麻煩你』 ，大家唔好誤會，就算今日有人咁樣叫我講英文，我都一樣會叫佢shut up ！你聽唔明咪算囉 ！」全場觀眾即拍掌歡呼，「 我唔知你哋鼓咩掌，如果David Bowie喺度唱，你會唔會叫佢講國語！講講廣東話呀！奇怪！我都係塞番耳塞算。」

觀眾網民即時討論，最後更成為熱搜， 百份之九十九嘅觀眾支持佢講廣東話，更有歌迷留言叫佢喺內地開唱全部用廣東話、唱廣東歌，因為呢個係佢哋喜愛Eason嘅原因，澳門網民則留言: 「我哋澳門不嬲講粵語！聽唔明不要來。」有觀眾認為咁冇禮貌，搞到Eason唔開心，有些博主長篇大論我國56個民族是一個多語言、多方言國家，陳奕迅祖籍東莞係一位粵語歌手，喺粵廣澳開演唱會講廣東話實屬正常。

Eason要全神貫注演餘下8場演出，反而更關注自己嘅睡床：「我住喺咪碧咸設計間房，第一晚瞓得麻麻，因為張床係我史上瞓過最硬，我一路瞓一路諗，碧咸咁特別設計，咁硬應該有原因，佢係一個運動員，可能瞓咁硬第日腰骨唔會咁攰，但係我瞓得好差……第二日我拉開張床睇吓，下面原來係塊木板，一問之下先知原來係上次李克勤要求瞓一張硬床，酒店問過我，有咩需求，我又講左句『冇特別』，張床唔好咁軟就得.....」Eason笑指職員以為佢同克勤係有咁需要，結果畀張塊硬板佢，之後職員換番張正常床褥即刻瞓得好好，再次充滿能量繼續做騷！

#陳奕迅 #Eason #澳門 #演唱會 #觀眾 #熱搜 #睡床 #硬床 #李克勤 #碧咸 #主題房




#TVB #無綫新聞 #News #StayHome #WithMe #跟我一樣 #宅在家