Ghazal by Pir Syed Naseer-ud-Din Naseer Golravi
Voice: Najeeb ur Rehman Naz

مری زندگی تو فراق ہے وہ ازل سے دل میں مکیں سہی
وہ نگاہِ شوق سے دور ہیں رگِ جاں سے لاکھ قریں سہی

ہمیں جان دینی ہے ایک دن وہ کسی طرح ، وہ کہیں سہی
ہمیں آپ کھینچئے دار پر جو نہیں کوئی تو ہمیں سہی

غمِ زندگی سے فرار کیا یہ سکون کیا، یہ قرار کیا
غمِ زندگی بھی ہے زندگی جو نہیں ہے چَین نہیں سہی

سرِ طور ہو سرِ حشر ہو ہمیں انتظار قبول ہے
وہ کبھی ملیں، وہ کہیں ملیں وہ کبھی سہی، وہ کہیں سہی

نہ ہو ان پہ جو مرا بس نہیں کہ یہ عاشقی ہے ہوس نہیں
میں انھیں کا تھا میں انھیں کا ہوں وہ مرے نہیں تو نہیں سہی

مجھے بیٹھنے کی جگہ ملے مری آرزو کا بھرم رہے
تری انجمن میں اگر نہیں تری انجمن کے قریں سہی

ترا در تو ہمکو نہ مل سکا تری رہگزر پہ جبیں سہی
ہمیں سجدہ کرنے سے کام ہے جو وہاں نہیں تو یہیں سہی

مری زندگی کا نقیب ہے نہیں دور مجھ سے قریب ہے
مجھے اُس کا غم تو نصیب ہے وہ اگر نہیں تو نہیں سہی

جو ہو فیصلہ وہ سنائیے اُسے حشر پر نہ اٹھایئے
جو کریں گے آپ ستم وہاں وہ ابھی سہی، وہ یہیں سہی

اُسے دیکھنے کی جو لو لگی تو نصیر دیکھ ہی لیں گے ہم
وہ ہزار آنکھ سے دور ہو وہ ہزار پردہ نشیں سہی

#NajeebNaz